ازاى تعرفى انك بتحبى واحد مجنون ؟

المحتوي

ازاى تعرفى انك بتحبى واحد مجنون ؟

تجربة الحب مع راجل سايكو تجربة مش سهلة بالمرة، حقيقي ممكن البنت تخرج منها مدمرة وتقعد سنين على ما تعرف تحب تاني أو تصدق أن في علاقات طبيعية من الاساس يعني، بس بعد لما بتفوق وبتعيش قصة حب جديدة طبيعية، وترجع تبص على تصررفات الشخص السايكو ده مش هننكر ان المواقف اللي بيعملها بتكون كلها بتضحك لما تشوفها من بعيد.

 انا بحبك وعشان كده لازم اقتلك

في مسلسل فريندز في لقطة مضحكة جدا كانوا بيتريقوا فيها على تعبير وش تشاندلر واطلقوا على تعبير الوش ده اسم “I love you and that is why I have to kill you”، ومفيش حد في الدنيا هيفهم مدى حقيقة الجملة دي الا البنت اللي ارتبطت براجل سايكو، لأن دايما بتحس وهي معاه ان جواه رغبة غريبة في تدميرها مش من باب اي حاجة تانية غير اللذة فعلا، الموضوع حقيقي بيعمله نوع من انواع النشوى.

 ارضيك ازاي

ده أكتر سؤال بيبقى بيدور في دماغ البنت اللي بتحب واحد سايكو، طول الوقت بتحاول تغير من نفسها و من تصرفاتها وتعمله مفاجات وافلام عشان بس تحس انها في علاقة طبيعية وان حبيبها راضي عنها، ولكن هيهات، ماتحوليش يا حبيبتي، مش عشان هو عارف ايه اللي يرضيه ومش عايز يقولك، هو اصلا مش عارف ايه اللي يرضيه اساسا، فبلاش تتعبي نفسك، كده كده هتطلعي  بشكل او باخر انسانة وحشة ماتستهليش تكوني معاه –ده من وجهة نظره طبعا-

مش مستريحلك

لازم تبقى فاهمة انه بردة مش هيكون كله نكد، والا ايه الدافع اللي هيخليكي تكملي لفترة اطول يقدر يعذبك فيهم بشكل مبتكر اكتر واكتر، فلازم كده كل فترة تلاقية إذ فجأتن اتحول الي انسان رومانسي رائع حنون جميل، ومجرد اما تبتدي تفرحي وتدي له الامان وتبدأوا تتكلموا بصراحة، هيصطاد اول كلمة طالعه من بقك مش عاجباه وينكد عليكي بيها.

 انا ولا يهمني

لما هينكد عليكي، هيحاول يثبت لك بكل الطرق انه كويس ومش فارق معاه انك زعلانة او انكم متخانقين، طبعا ده اداء الناس العادية وقت الغل برضه، بس هو بيكون ادائه متطرف شوية، يعني مثلا تكونوا متخانقين بليل تصحي تاني يوم تلاقيه سافر السلوم مع البعثة بتاعت مش عارف مين للاجئين المش عارف ايه – حدث بالفعل- وتلاقيه بيكلم وهو بيضحك و بيهرج وتخيلي رحت فين ومش بعيد في اخر المكالمة يقولك بحبك  وهو اصلا بيعمل كل ده بغل عشان الحاجة اللي عملتيها وضايقته.
لو انتي لسه في بداية علاقة مع شخص بيعمل الحاجات دي باستمرار، فأحب اقولك أجري، بجد أجري كأن الجحيم يطاردك، مش هتاخدي حاجة من العلاقة دي غير الأمراض النفسية و أن ثقة هتتهز بنفسك ومش بعيد تخسري كل اللي حواليكي.. الحقي نفسك وانفدي بجلدك من دلوقتي.

التعليقات مغلقة.