الإنترڤيوهات…والرعب من الإنترڤيهوات

الإنترڤيوهات … إنترڤيو الشغل. فيه كتير جدًا، بيشيلوا هم الإنترڤيو. بيخافوا، بيقلقوا، طب أعمل إيه؟ طب ألبس إيه؟ طب أنا أترفدت في مليون إنترڤيو قبل ده، أروح تاني ليه؟ طب أنا مشوني في الشغل اللي قبل ده، أقول لهم إيه؟ . إنترڤيو الشغل بيبقى هم ومن تجربتنا مع الإنترڤيهوات اللي عملناها وروحناها، تلخيصنا هو الآتي .

الإنترڤيوهات … أعمل ايه ؟

تلتزم بالميعاد :

طبعًا لازم توصل في ميعادك. كتير بتوصل في ميعادك وتتلطع تستنى الشخص اللي هيقابلك لأنه هو مش متلزم بميعاده. مش مهم، انت برضه لازم توصل في ميعادك. ولأن البلد دايمًا بتفاجئنا بالزحمة، فأعمل حساب ساعة زيادة. وصلت بدري، استنى في العربية أو أي حتة قريبة من المكان. وصلت متأخر برضه، تعتذر جدًا عن ده، مش كأنه حق وعادي.

ألبس اللي مريّحك:

جرت العادة إن لازم النصيحة اللي قبل أي انترڤيو هي إنك تلبس حلو جدًا. أكيد لازم يبقى مظهرك لائق، بس مهم تبقى اللي لابسه مرتاح فيه علشان تعرف ترتاح في الكلام.

جاوب بصدق..التحوير مالوش داعي:

ما تكذبش أبدًا وانت بتحكي عن أي شغل كنت فيه قبل كده. ما تقولش كنت في المكان الفلاني ٨ شهور وهما مشوك بعد شهر. ما تقولش أتخرجت بتقدير معين وانت نجحت بأعجوبة. ما تتدعيش إن عندك مهارة مش عندك. لا تكدب في السي ڤي ولا تكدب في الانترڤيو. لما تتسأل سؤال “شايف نفسك فين كمان خمس سنين؟” قول بصراحة إنك مش عارف لو فعلًا مش عارف. قول إنك شايف بس كمان سنة. بلاش تألف ولا تأڤوّر.

ما تشتمش في ناس أشتغلت معاهم:

حتى لو ليك حق، بالنسبة للي بيعمل لك إنترفيو ده فعل غير أخلاقي وممكن يحصل معاهم لما في يوم تسيبهم همّا.

انت كمان اسأل:

لو عندك أي سؤال عن تفاصيل الوظيفة، ما تتكسفش. انت كمان اسأل وأفهم لأن ده بيعكس إنك مهتم ومركّز ومش أي شغلانة والسلام.

خلّيك لطيف:

ما تبقاش قافش ومكشر أو قلقان. أبتسم وأتعامل على إنها مقابلة تعارف علشان شخصيتك الحقيقية تبان، وده هيفيدك وهيفيدهم.

التعليقات مغلقة.